Störf þingsins

Samtök afurðastöðva í mjólkuriðnaði (SAM) telja mikilvægt að framleiðendur landbúnaðarafurða á Íslandi búi við sömu rekstrarskilyrði og framleiðendur landbúnaðarafurða í Noregi og ESB búa við. SAM telja að sú samræming reglna sem lögð er til með máli 18/2022 í samráðsgáttinni sé jákvætt skref í þá átt að tryggja samkeppnishæfni innlendrar matvælaframleiðslu gagnvart erlendri samkeppni. SAM er kunnugt um að túlkun og framkvæmd evrópskra reglna um framleiðslu matvæla er misjöfn milli landa ESB. Sem dæmi má nefna að framleiðsla undir merkjum lífrænnar framleiðslu hefur víðast í ESB krafist staðfestingar frá sjálfstæðum vottunarstofum, en í Danmörku hefur vottun og túlkun reglna um lífræna framleiðslu verið á hendi stjórnvalda. Einnig er SAM kunnugt um að veittar hafa verið undanþágur frá reglugerð ESB um lífræna framleiðslu og að undanþágur sem veittar eru í hverju landi séu tilkynntar til ESB og þær séu aðgengilegar stjórnvöldum á vefsíðu þar sem hægt er að nálgast upplýsingar um allar undanþágur allra landa innan ESB (einungis aðgengilegt stjórnvöldum). Þegar vitað er að innan ESB eru veittar undanþágur frá reglugerðum nægir þess vegna ekki að taka upp evrópskar reglugerðir til að tryggja samkeppnishæfni innlendrar matvælaframleiðslu. SAM hvetja stjórnvöld til að fylgjast vel með undanþágum sem þjóðir innan ESB veita frá eigin reglugerðum; að öðrum kosti mun samkeppnishæfni innlendrar framleiðslu skerðast. Reykjavík 4. febrúar 2022 F.h. Samtaka afurðastöðva í mjólkuriðnaði Sigurjón R. Rafnsson, formaður stjórnar